Kryetari i BDI-se, z. Ali Ahmeti, priti sot në selinë e partisë në Recicë të Vogël ambasadorin e Mbretërisë së Bashkuar në Shkup, z. Endrju Ki.

Zhvillimet e fundit në vend dhe procesi i gjetjes së zgjidhjes për kontestin e emrit që Maqedonia ka me fqiun jugor ishte tema që trajtuan të dy bashkëbiseduesit.

Periudha prej gjashtë muajsh që Brukseli i dha Maqedonisë për tejkalimin e pengesës së fundit për anëtarësimin në NATO dhe fillimin e negociatave për anëtarësim në UE, sipas ambasadorit Ki duhet të shfrytëzohet maksimalisht dhe Maqedonia të vazhdojë në rrugën e integrimeve evro-atlantike.

Kryetari Ahmeti dhe ambasadori Ki ranë dakord se të gjithë faktorët politik e shtetëror duhet të mbajnë përgjegjësi për cdo veprim dhe moment të cilët mund të prekin kohezionin e brendshëm dhe relacionet ndërmjet bashkësive duhet trajtuar me kujdesin dhe përkushtimin më të madh.

Zhvillimet e fundit në sferën e arsimit dhe debatet rreth Projektit Shkupi 2014 duhet trajtuar me kujdesin më të madh dhe për asnjë cmim të mos cenojnë marrëdhëniet në mes komuniteteve në vend. Për të evituar cdo keqinterpretim dhe cdo keqpërdorim të cilësdo temë të nxehtë, të dy bashkëbiseduesit  vlerësuan faktin që Komiteti për marrëdhënie mes bashkesive në Parlamentin e Maqedonisë është institucioni më meritor për trajtimin, menaxhimin dhe debatin publik për këto dhe tema te ngjashme.

Gjithashtu, në takimin e përzemërt dhe miqësor, theks i vecantë iu vu edhe procesit të reformave në administratën publike si element i rëndësishëm në implementimin e standarteve evropiane dhe debati parlamentar për sa i përket kycjes së opozitës në të gjitha aspektet e angazhimeve të Parlamentit përfshi këtu edhe rishikimin e Rregullores së Parlamentit.