Me rastin e përvjetorit të 542 të vdekjes së heroit kombëtar Gjergj Kastriotit, dhjetëra qytetarë, politikan dhe shoqata joqeveritare, i janë përgjigjur thirrjes së lëvizjes qytetarë ‘Zgjohu’ për të vendosur lule pranë bustit të Skënderbeut në Shkup.

Lideri i Bashkimit Demokratik për Integrim Ali Ahmeti, me këtë rast tha se vepra e Skënderbeut mbetet frymëzim për të gjithë shqiptarët. "Ky burrë që është i derdhur në bronz në qytetin e vjetër të Shkupit, ka merita të veçanta për civilizimin evropian si dhe për lirinë e gjithë shqiptarëve. Ka qenë mbetet frymëzim për çdo shqiptarët dhe ne ndjehemi krenarë që e kujtojmë" u shpreh Ahmeti.

Ahmeti, po ashtu foli edhe për çështje tjera aktuale. Ai hodhi poshtë zërat për zgjedhje të parakohshme dhe për rikonstruim të qeverisë. "Ne akoma nuk kemi biseduar për rikonstruim të qeverisë. Sa i përket zgjedhjeve të parakohshme ato mbahen kur vendi është në krizë, kur nuk ecin gjërat siç duhet. Këto simptoma as për së afërmi nuk janë paraqitur në Maqedoni. Koalicioni funksionon nuk ka ndonjë shqetësim për krizë politike në vend" tha Ali Ahmeti.

Numri një i BDI-së, ka komentuar edhe sondazhet e fundit. Sipas tij, këto rezultate obligojnë funksionarët e partisë së tij për të punuar më tepër. "Rejtingu i BDI-së gjithmonë ka lëvizur nga 8-13%. Është e natyrshme që të jenit në pushtet, të gjitha shigjetat bien nga ne, por kjo na obligon që të jemi më aktiv dhe të themi gjërat ashtu sic janë. Për këto 15 muaj, BDI ka bërë punë të mrekullueshme. Ka akoma çka të bëhet por, jam krenarë për këtë që është bërë dhe që mbetet në kujtesën e shqiptarëve të Maqedonisë", tha Ahmeti.